Retransmitimos deporte en galego

Onte recibimos unha visita moi grata, xa que estiveron con nós Marta Souto, do SNL de Vigo que nos falou sobre o uso do galego no concello de Vigo e nos presentou a campaña que están a a realizar “Gústame o galego de Primeira”

Tamén contamos coa presenza de Xaime Escudeiro, locutor deportivo da Radio Galega, que cobre a información do RC Celta de Vigo.

Gustounos moito a súa visita porque nos contaron moitas cousas sobre o galego e as retransmisións deportivas, dende o comezo da súa carreira ata a actualidade.

Despois da charla fixemos un concurso para ver quen cantaba mellor un gol. Aquí tedes os protagonistas.

Foi unha tarde moi divertida e enriqeucedora.

Grazas, Marta e Xaime por achegarvos ata O Rosal e compartir con nós o voso tempo!!!!

 

8 de Marzo, Día da Muller

Hoxe, 8 de marzo é o Día da Muller e dende aquí queremos compartir con vós esta data na que se reivindica a igualdade entre homes e mulleres. Como sabedes, a diferenza entre varóns e mulleres continúa a ser moi grande na actualidade. As mulleres continúan a ter soldos máis baixos, a coidar das persoas, a abandonar o traballo cando teñen fillos e a sufrir continuas agresións por parte das súas parellas. Aquí tedes un artigo onde se fala de toda esta desigualdade e un pequeno vídeo onde unha moza da vosa idade analiza a vida, o esforzo e o traballo da súa avoa e do seu avó.

No noso colexio quixemos contribuír a reivindicar esta data da man do carrabouxo, que coa súa retranca tan coñecida expón este tema dende un punto de vista crítico, pero tamén cunha dose moi fina de ironía. Así, colgamos unha serie de láminas feitas por el e cedidas polo IES O Mosteirón, de Sada.